ដោយ : បន្ទាយ
បន្ទាយមានជ័យ៖ ករណីខ្ចីម៉ូតូគេជិះមិនឃើញយកមកសង ម្ចាស់ទៅប្តឹងសមត្ថកិច្ច ប៉ុន្តែប្រតិកម្មអវិជ្ជមាន១បានកើតឡើង ដោយជនសង្ស័យបានលើកគ្នាជាច្រើននាក់ទៅកាប់ជនរងគ្រោះដល់ផ្ទះ កាលពីវេលាម៉ោង១០យប់ ថ្ងៃទី២៧ ខែមិថុនា ឆ្នាំ២០២៤នេះ នៅភូមិសាមគ្គីមានជ័យ ក្រុងប៉ោយប៉ែត ខេត្តបន្ទាយមានជ័យ ។
ជនបង្កដៃនិងគប់គិតត្រូវបាននគរបាលអធិការដ្ឋានក្រុងប៉ោយប៉ែត បានឃាត់ខ្លួនជាបន្តបន្ទាប់។
យោងពាក្យបណ្តឹង ជនរងគ្រោះមានឈ្មោះ សេង រតនា ភេទប្រុស អាយុ ២០ឆ្នាំ មុខរបរ សន្តិសុខ ស្នាក់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ រាយការណ៍ថា៖ នៅថ្ងៃទី១៥ ខែមិថុនា ឆ្នាំ២០២៤ ពេលល្ងាច ខ្លួនបានខ្ចីម៉ូតូពីឈ្មោះណាក់ ម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ គ្មានផ្លាកលេខ នៅបុរីដួងចន្ទ និងបានជិះទៅអគារថ្មី ពេលទៅដល់ក៏ជួបឈ្មោះ ហុង ចយ ភេទប្រុស អាយុ២០ឆ្នាំ និងឈ្មោះ សៀន នៅទីនោះ ។ ២នាក់នោះក៏សុំខ្ចីសាកជិះ ។លុះវេលាម៉ោង ជាង៥ល្ងាច ក៏បានបាត់ឈ្មោះ ហុង ចយនិងម៉ូតូ ហើយឈ្មោះ សៀន ក៏បានជូនខ្លួនមកហាងវិញ និងប្រាប់ថាគេនឹងទៅរកអាហុងចយ។
ដោយមិនឃើញឈ្មោះ ហុង ចយ យកមកម៉ូតូមកសងវិញ ជនរងគ្រោះបាននាំគ្នាទៅដាក់ពាក្យបណ្តឹងឲ្យនគរបាលជួយអន្តរាគមន៍ ។ ប៉ុន្តែរឿងស្មានមិនដល់មួយបានកើតឡើង ដោយ២យប់ជាប់គ្នា នៅយប់ទី២៦ ខែមិថុនា ឆ្នាំ២០២៤ និងយប់ថ្ងៃទី២៧ ខែមិថុនា ឆ្នាំ២០២៤ ជនសង្ស័យបានលើកគ្នាជាច្រើននាក់ ជិះម៉ូតូជាច្រើនគ្រឿង ប្រដាប់ដោយកាំបិត និងកាំភ្លើងខ្យល់ បានចូលមកដេញកាប់ជនរគ្រោះដល់ក្នុងផ្ទះមួយកន្លែង ។ ក្រឡេកឃើញ ជនរងគ្រោះនាំគ្នារត់គេចខ្លួនទាន់។
ករណីនេះ ក្រោយទទួលបានព័ត៌មាននិងពាក្យបណ្តឹងជនរងគ្រោះ លោកឧត្តមសេនីយ៍ទោ សិទ្ធ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់បទបញ្ជាដល់កម្លាំងនគរបាលផែនព្រហ្មទណ្ឌ និងកម្លាំងអធិការដ្ឋាននគរបាលក្រុងប៉ោយប៉ែត ចុះស្រាវជ្រាវនិងឃាត់ខ្លួនជនសង្ស័យបានចំនួន២នាក់ យកមកសួរនាំជុំវិញករណីខាងលើ ដើម្បីចាត់ការបន្តតាមនីតិវិធី។
គួរកត់សម្គាល់ថា កម្លាំងស្នងការដ្ឋាននគរបាលខេត្តបន្ទាយមានជ័យ តែងតែពង្រឹងការយាមល្បាត បង្ក្រាបរាល់បទល្មើសគ្រប់ប្រភេទ ពិសេសបទល្មើសព្រហ្មទណ្ឌនិងក្មេងទំនើង ជាប្រចាំ ៕
